March 10, 2021 - Mladi.mk

За проектот

Балкански млади: поврзување на едукацијата, способностите и партнерскиот потенцијал во регионалните практики за вработување е меѓународен проект кој се спроведува во Белгија, Црна Гора, Турција Босна и Херцеговина, Албанија, Србија и Северна Македонија. Главната цел на проектот е да придонесе за младински претприемачки можности и да ги зајакне перспективите за вработување на младите од Западен Балкан. Проектот започна да се имплементира во март 2020 година, а ќе трае до февруари 2023 година.

За обуките за градење на капацитети

Во склоп на овој проект, Национален младински совет на Македонија отвара повик за граѓански организации кои имаат потреба од градење на капацитетите во три области: застапување, обезбедување на фондови (fundraising) и креирање политики.

Предвидените дати за обуките се следниве:

Обука за застапување – 29.03.2021, 30.03.2021 и 31.03.2021

Програмата за обуката за застапување ќе обезбеди приказ на успешни и неуспешни кампањи за застапување, видови и начини на застапување, дефинирање засегнати страни, целни групи и нивно мапирање. Дополнително, во склоп на обуката ќе се опфатат и алатки за застапување базирано на докази. Во текот на обуката ќе се работи низ практични примери, а секој од учесниците ќе изработи план за застапување на тема која самостојно ќе ја изберат и утврдат.

Обука за обезбедување фондови (fundraising) – 29.03.2021, 30.03.2021 и 31.03.2021

Програмата за обуката за обезбедување на фондови ќе биде фокусирана на 4 главни начини за прибирање на фондови и тоа: традиционални донатори, создавање на сопствени услуги и продукти, користење на општествена одговорност и употреба на crowdfunding моделот. Идејата преку овој пристап е да се подигне свесноста кај граѓанските организации за различните можности за финансирање а и да ги поттикне да ги применат знаењата во пракса и да креираат сопствени модели. Како дополнителен клучен дел ќе биде опфатено промовирање и маркетинг како неопходен дел од прибирање на средствата.

Обука за креирање на политики – 24.03.2021, 25.03.2021 и 26.03.2021

Програмата за обуката за креирање политики ќе се фокусира на потребата, важноста и процесите на креирање јавни политики и улогата на граѓанските организации, преку различни методолошки пристапи. Дополнително, програмата ќе понуди анализа и мапирање на чинители како и видови на стратегии при процесите на креирање на политики. Клучен дел ќе биде и градењето на партнерства и стратешки коалиции како и подобрување на соработката помеѓу граѓаните и носителите на одлуки во процесот на креирање јавни политики. Секој учесник ќе има можност да изработи акционен план, мобилизација на ресурси како и план за следење и оценување на истиот.

Обуките ќе се реализираат електронски, преку платформата ZOOM. Работниот јазик на обуките ќе биде македонски јазик. Обуките ќе траат по 4 часа на ден.

Обуките се наменети за граѓански организации кои работат во некое од следниве полиња:

Млади
Претприемништво
Вработување
Соработка и работа со бизнис секторот

Начин на аплицирање

Сите заинтересирани организации може да аплицираат преку следниов линк, најдоцна до 22.03.2021 година, до 23:59 часот. По завршувањето на рокот за аплицирање, избраните организации ќе бидат контактирани со повеќе детали. При голем број на апликации, предност ќе се даде на мали организации и организации од рурални средини.

Фондацијата Отворено општество – Македонија (ФООМ) во рамки на концептот „Зелен скок – Партнерства за климатска акција“, објавува повик за доделување грантови за креативни акции и кампањи на граѓански организации и активистички јадра кои активно работат и /или имаат интерес да работат на унапредување на заштита на животната средина; сакаат да придонесат за зголемување на јавната свест за потребата од промена на негативните однесување на поединците и заедниците, бизнисите, одговорна и отчетна работа на локалните власти, централните власти и јавни институции во областа климатски промени.

ФООМ ќе поддржи проекти за иновативни и креативни акции и кампањи кои треба да укажат на тековните предизвици и да понудат решенија или дополнително толкување за последиците од неактивноста за сопирање на енормното аерозагадување, растечката загрозеност на биолошката разновидност, намалувањето и злоупотребата на зелените површини и водите, управувањето со цврстиот отпад итн.

Предлог проектите треба да користат креативен пристап за едукација на граѓаните и јакнење на свеста, да поттикнат дискусија во јавноста за унапредување на решенијата за политиките, каде што гласовите и придонесите на граѓаните од економски и социјално загрозените заедници ќе бидат почитувани и вклучени; да ја мобилизираат јавноста и да се застапуваат за подобрување на политиките и практиките кои се однесуваат на заштита на животната средина и ефективна климатска акција. Како дел од пристапот проектите ќе треба да предвидат да организираат и фасилитираат консултативни процеси за вклучување на заедниците во решавањето на проблемите кои ги засегаат и се очекува да предизвикаат видливо влијание и позитивни промени во ставовите и однесувањето и на членовите на заедниците и на претставниците на локалните власти. За организациите и активистичките јадра кои ќе бидат избрани да добијат грантови за проектите, а ќе имаат потреба ФООМ ќе обезбеди обука за користење на методологијата за креативен активизам. Проектите треба да промовираат интегративен пристап со фокус на заедниците, родот и лицата со посебни потреби.

Вкупниот фонд за поддршка на овој тип проекти е 80.000 американски долари. Максималното траење на проектите треба да биде осум месеци.

Материјалите за пријавување се достапни на линковите подолу. Пријавата треба да биде целосно пополнета, со користење фонт Calibri, големина 11. Пријавите, заедно со дополнителните документи, треба да се поднесат електронски, и тоа и во word и во pdf формат, на следнава адреса: [email protected] со наслов на пораката кој содржи Име на подносител и наслов на проект/иницијатива. Доколку имате прашања, поставете ги на [email protected] и [email protected] најдоцна пет дена пред истекот на крајниот рок за поднесување пријави.

Рокот за поднесување пријави е до 21 март 2021. ФООМ го задржува правото да не додели средства доколку процени дека предлог проектите не ги исполнуваат очекуваните стандарди. Во текот на процесот на оценување, ФООМ може да побара дополнителни информации за предлог-проектот, а тоа не подразбира дека предлог-проектот ќе биде поддржан.