Отворен повик за практиканти!

Преку проектот „МладиХаб – надминување на нееднаквоста меѓу младите” кој го спроведува Националниот младински совет на Македонија во соработка со Stella Network отворен е повик за 100 млади лица кои сакаат да се вклучат и поминат низ двомесечна практикантска програма со финансиски надоместок.

Сите заинтересирани кандидати за учество во практикантската програма потребно е да:

  • Бидат на возраст од 15 до 29 години
  • Да не се во работен однос
  • Да имаат завршено најмалку основно образование
  • Да можат да извршуваат практикантска работа во времетраење од два месеци во назначен правен субјект.

Избраните кандидати ќе ги имаат следниве услови за извршување на практикантската работа:

  • Назначено ментор лице во правниот субјект каде ќе се изведува практикантството кое ќе ги следи во текот на целата пракса;
  • Назначено одговорно лице од НМСМ кај кое ќе може да се обратат во текот на целата пракса;
  • Месечен бруто надоместок во висина од 150 фунти;
  • Можности за учество и вмрежување на настани од проектот;
  • Можност за вработување по завршување на практиканството;
  • Стекнување на нови вештини, знаења и компетенции.

Заинтересираните кандидати треба да имаат регистрирано профил на платформата CareerHub и да го пополнат формуларот достапен на овој линк најдоцна до 18 јуни 2023, до полноќ.

За сите останати прашања и информации за проектот или повикот, обратете се на [email protected] или на 070 399 058.

Повеќе информации за повикот како и за самиот проект, можете да пронајдете тука.

ПИШИ-БРИШИ – Работилница за креативно пишување

КСП Центар – Јадро организира дводневна работилница за креативно пишување „ПИШИ-БРИШИ“ наменета за млади на возраст од 15 до 18 години. – ЛИНК oд настанот

Менторки: Марија Бошковска и Ивана Смилевска

Место: Центар Јадро, Алберт Ајнштајн 2, Скопјe

Датум: 05.06 – 06.06.2023 година
Повикот за учество во работилницата е отворен за млади на возраст од 15 до 18 години.
*Бројот на учесници е ограничен.
ЛИНК за пријавување 👉 https://forms.gle/s5sDpDxEj76UhuyZ9
❗ Рок за пријавување: 01.06.2023
Од почетокот на времето, приказните се сведоштва за она што било, тие се поуки за она што треба да биде и повторлив обид да се зграпчи и замрзне недофатноста на сегашниот момент. Раскажувањето и создавањето приказни е неразделив дел од човековата природа. Тоа ни помага да споделиме информација, да креираме емоционални врски и реченица по реченица да ѕирнеме во мистеријата на постоењето. Приказните го менуваат човекот, а луѓето, еден по еден, го менуваат светот…
„Пиши – бриши“ е работилница за креативно пишување на македонски јазик наменета за млади од 15 до 18 години. Целта на работилница е учесниците да се впуштат во процесот на смислување, пишување и читање приказни, како и да го збогатат својот фонд на зборови и потечно да се изразуваат.
Работилницата е поделена на два дела, еден теоретски, со фокусот кон откривање на тајните на пишувачкиот занает низ читање во кој младите учесници ќе се запознаат со почетоците на книжевноста, магичната моќ на приказните и растегливоста на јазикот.
Вториот дел од работилницата е практичен, а младите низ вежби за креативно пишување ќе имаат прилика да создадат и осмислат своја приказна, користејќи ги откриените алатки од првиот дел на работилницата.
————————————————————
Марија Бошковска е дипломирана компаратистка на катедрата за Општа и Компаративна книжевност. При нејзината работа како наставничка има стекнато искуство со онлајн предавања, преку кои е запознаена со предизвиците на дигиталното образование. Преку работата во издаваштвото и водењето на платформата за култура „Пиреј“, таа е запознаена со новите книжевни текови, состојбата на книжевноста и културата на ова поднебје. Има пишувано книжевни и филмски критики, интервјуа, анализи на популарната култура, бајки, академски и фикционални текстови, секогаш социјално ангажирани.
Ивана Смилевска е дипломирана компаратистка од катедрата за Општа и компаративна книжевност. Работи како новинарка, а пишува и проза. Во 2020 ја добива новинарската награда „Жан Моне“ за најдобра новинарска сторија која ја доделува ССНМ и Делегацијата на ЕУ. Во 2022 ја добива новинарската награда „Светилник на невидливите” која ја доделува Македонската платформа против сиромаштија. Истата година ја добива втората награда за најдобар краток расказ која ја доделува весникот „Нова Македонија”. Заинтересирана е за жанровските вкрстувања, сатира, фикција и мемиња. Смета дека пристапот кон книжевноста треба да ја има предвид дигитализацијата и новите зборовни форми, а веќе долго време го анализира политичкото во културата и ангажираната уметност. Пишува новинарски текстови од областа на образованието, културата и младите.